حماريزم

حماريزم

شايلك و ضهري ماشتكي
ما هربت يوم من شغلتك
راكب و قاعد أنتكه
و نصيبنا بس بقسوتك
مبسوط قوي بالهشتكة
تزغدني دايما بلغتك
و كأني داخل معركة
و تمللي تعوج ضبتك
ما يوم هربت من الحمول
مهما بتتقل نقلتك
طب هي دي تبقي الأصول
آخرتها علقة بجزمتك
مع إنها من جلدنا
و مسيرها تلسع قرعتك
علشان حمار و أستحملك
تقوم تزود ضربتك
الصبح بدري تفكني
و لجام حديد فيه مسكتك
تقولشي يعني هروح بعيد
أهرب و أفارق طلعتك
نقلة سباخ سارح بها
علشان تسبخ زرعتك
لا رفست يوم أو زربعة
قمصت ضهري لقعدتك
الأكل دايما مهزلة
إللي يفيض من عجلتك
أو تبن حاف من مخزنك
داهية تكبر وكستك
هديت في حيلي و عفيتي
علشان توفر صحتك
مين الحمار يستحملك
أو حتي يرضي بعشرتك
الفول تجيبه لمدودي
و فجأة يبقي للأكلتك
إن فاض شوية من الغدا
تجري تاكل فرختك
طب حط يوم حبة درة
دا أن إللي فاكك زنقتك
أرجع و أقول م أنا السبب
علشان حمار مش غلطتك

الحمار و الغرام

حماري ناصح و عمره فالح
حبيب ملاوع و قلبه أخضر
في كل حته له خمسة سته
نصاب أراري عامله منظر
و جارنا نايم حدا البهايم
حمارته حلوة و لونها أسمر
هرب حمارنا من صحن دارنا
دخل زريبة و الصوت يكركر
بدأ يغازل و حب نازل
نهيقه طالع و صوته زمر
حمارة عشقت عشانه سكتت
حبيبها رايح و قلبه فرفر
زعل أخينا و عتب علينا
إزاي حمارنا عليها دور
بكام جريدة و كام حديدة
تحتاج لفديو عشان يصور
دي علقة توجع ما شافها مطلع
ودانه دلت و رجله جرجر
و كام نصيحة يادي الفضيحة
و علقة سخنة خلاه يشفطر