طلبونى وزير

طلبونى وزير
رن التليفون و بأجمل صوت
بيقول إن أنا أصبحت وزير
المكتب فخم و شى الفحم
ماعدش بصارة مفيش جرجير
شقة على النيل بتقول مواويل
و حساب بالكوم و الدخل كبير
قابض عمولات صارف بدلات
و الرسميات مافيهاش تزوير

و بنات قمرات زى الشربات
بتجيبلى البوستة على التوقيع
الصحرا براح و الملك مباح
ينقصنى كمان حبة تلميع
و كتير قنوات فى الفضائيات
تعمل لقاءات عماله تذيع
أعضاء جايين طلبات جايبين
للبنى آدمين موسم تجميع

أحجز شاليهات للصيف بالذات
ما تغور بقى عنى يا حمو النيل
نحست الجتة فى سبعة و ستة
عرقنا كتير و الحمل تقيل
زغدتنى مراتى وراها حماتى
قوم هات طعمية و فول يا عليل
نايم خنفر مرمى تشخر
صوتك عفر طول الليل

ضهرها ليا و نايمة فى مية
دعيت أوليا أغور م الحارة
كات هتنعنش يومها تفرفش
لوز هتقرقش تنسى بصارة
هبيت فيها و إيدى عليها
عاليها واطيها اسكتى يا حمارة
راح العز و أكل الوز
بكلمة فز نهيتى وزارة